Bashkimi Evropian paralajmëroi ndihmë financiare për vendet e Ballkanit Perëndimor në zbatimin e reformave
[30 tetor, 2023]
Bashkimi Evropian planifikon të ndihmojë vendet e Ballkanit Perëndimor në zbatimin e reformave të nevojshme për integrimin në bllokun e pasur me një investim prej 6 miliardë eurosh, tha presidentja e Komitetit Ekzekutiv të BE-së, Ursula von der Leyen, në Shkup, të hënën, raporton Reuters.
Maqedonia e Veriut, Shqipëria, Kosova, Serbia, Mali i Zi dhe Bosnja dhe Hercegovina duhet të përdorin mundësinë për zgjerimin e BE-së dhe të angazhohen në harmonizimin e standardeve të tyre me ato në fuqi në bllok, tha Ursula von der Leyen.
Ajo shtoi se plani i ri i rritjes së BE-së për rajonin do të përfshijë gjithashtu hapjen e një tregu të përbashkët drejt vendeve të Ballkanit Perëndimor në fusha të tilla si lëvizja e lirë e mallrave dhe shërbimeve, transporti dhe energjia.
Von der Leyen u bëri thirrje vendeve që të hapin një treg të përbashkët rajonal dhe të vazhdojnë me reformat e nevojshme.
Maqedonia e Veriut, për shembull, duhet të reformojë mjedisin e saj të biznesit, të krijojë një administratë publike efikase, të sigurojë që të ketë financa publike të shëndetshme dhe të forcojë luftën kundër korrupsionit. Ky vend duhet të ndryshojë kushtetutën e tij dhe të njohë bullgarët si pakicë, siç kërkohet nga Bullgaria, gjë që do t’i mundësojë anëtarësimin në BE.
“Këto reforma do të vijnë me investime”, tha Von der Leyen në një konferencë për shtyp të mbajtur me kryeministrin e Maqedonisë së Veriut, Dimitar Kovaçevski, në fillim të turneut të saj në vendet e Ballkanit Perëndimor.
Më vonë gjatë ditës, ajo vizitoi Kosovën. Aty, ajo u bëri thirrje autoriteteve që t’i japin pakicës serbe, e cila përbën rreth 5 për qind të popullsisë, më shumë autonomi duke krijuar një asociacion komunash.
Serbia dhe Mali i Zi ishin të parët në rajon që nisën negociatat për anëtarësimin në BE, dhe më pas Shqipëria dhe Maqedonia e Veriut filluan negociatat me Brukselin vitin e kaluar. Por Bosnja dhe Kosova janë ende shumë prapa fqinjëve të tyre në këtë proces. [GN/ISHGJ]
