[Demonstruesit serbë brohorasin slogane gjatë një demonstrate masive kundër korrupsionit dhe presidentit Vuçiq.]
Është ndoshta demonstrata më e madhe në historinë serbe. Pjesëmarrësit në protesta fajësojnë korrupsionin nën Vuçiqin për katastrofën në Novi Sad.
Midis 107,000 vetash, sipas policisë, dhe 800,000 veta, sipas organizatorëve, morën pjesë në demonstratën më të madhe kundër korrupsionit dhe qeverisë serbe deri më tani në kryeqytetin serb – në Beograd. Sipas policisë, ka pasur përleshje mes grupeve individuale – ishin mobilizuar edhe mbështetësit e qeverisë. Sipas raportimeve të mediave serbe, 56 persona janë lënduar. 22 të tjerë u arrestuan. Sipas burimeve qeveritare, të paktën gjashtë prej tyre dyshohen se kanë planifikuar “veprime kundër rendit kushtetues dhe sigurisë në Serbi”.
Në mbrëmje, një grup studentësh u bënë thirrje demonstruesve që të tërhiqen nga afërsia e Parlamentit pasi u hodhën shishe dhe gurë.
Pjesëmarrësit udhëtuan për në kryeqytetin serb nga i gjithë vendi; mijëra njerëz ishin tashmë në rrugë disa orë para fillimit të demonstratës. Fermerë, studentë dhe qytetarë të tjerë qëndruan përgjatë rrugës së demonstratave gati dy kilometra në Beograd. Turma këndoi sloganin e lëvizjes “Pumpaj!” Pumpaj!”[Fryjë! Fryjë!], që synon të shprehet se protestës nuk i mbaron energjia dhe fryma. Shumë prej tyre mbanin stema me një dorë të përgjakur, gjithashtu një simbol i protestave. “Korrupsioni vret”, është thirrja e betejës së protestuesve. “E gjithë Serbia u rebelua, diçka që nuk e shihni çdo ditë. “Unë mendoj se ky është fundi i regjimit,” tha një pjesëmarrës.
Protestat e udhëhequra nga studentët filluan pas shembjes së një tende stacioni treni në qytetin e Novi Sadit më 1 nëntor, që kishte vrarë 15 njerëz. Aksidenti nxiti zemërimin për korrupsionin në Serbi dhe protestat tani janë drejtuar edhe kundër qeverisë së presidentit Aleksandar Vuçiq. Që atëherë, ka pasur protesta të mëdha në të gjithë vendin dhe atë prej muajsh.
Mbështetësit e qeverisë ishin gjithashtu të pranishëm, duke përfshirë ultranacionalistë, anëtarë të grupeve militante dhe huliganë të dyshuar që kishin ngritur barrikada pranë Parlamentit. Mbështetësit e qeverisë kanë ngritur edhe tenda para zyrës presidenciale.
Njerëz të mblidhur para Kuvendit të Serbisë gjatë një mitingu të madh kundër korrupsionit.
Vuçiqi: Nuk do të lejoj që rruga të diktojë rregullat
Presidenti Vuçiq komentoi demonstratën e madhe të së shtunës në mbrëmje, të cilën ai e përshkroi si një “protestë të madhe me energji të jashtëzakonshme negative ndaj autoriteteve”. “Nuk ka pasur viktima apo lëndime serioze”, tha ai. “99 për qind” e studentëve qëndruan të qetë gjatë tubimit. Një ditë më parë ai kishte theksuar se nuk do të lejonte që të vihej nën presion nga demonstratat. Ai nuk do të lejojë që “rruga të diktojë rregullat”.
I pyetur për një demonstratë të madhe kundër Viktor Orban-it që u zhvillua gjithashtu në Hungari të shtunën, Vuçiç u përgjigj se kishte “të njëjtat shenja dalluese” si protestat në Serbi – një aludim për pretendimet e tij se Perëndimi qëndron pas demonstratave antiqeveritare në rajon. Toni në mediat shtetërore ishte bërë edhe më i ashpër para demonstratës të së shtunës. Studentët po planifikonin një “grusht shteti”, u tha.
Qeveria serbe është nën presion dhe atë në rritje për shkak të valës së protestave. Në fund të janarit, kryeministri Millosh Vuçeviç njoftoi dorëheqjen e tij, e cila ende duhet të ratifikohet nga Asambleja Kombëtare – për momentin, ai do të qëndrojë në detyrë. Ndërkohë, presidenti Vuçiç bën thirrje për dialog ose fajëson ndërhyrjen e huaj për protestat. Protestat fokusohen në kërkesat e qarta lidhur me tragjedinë në Novi Sad. Për shembull, shkarkimi i ministrave që kishin mbikëqyrur rinovimin e tendës së stacionit. Megjithatë, kundërshtarët politikë të Vuçiqit po bëjnë thirrje gjithnjë e më shumë për formimin e një “qeverisë kalimtare” për të mbikëqyrur zgjedhjet e reja. Vuçiq ka pranuar të mbajë zgjedhje të reja, por ka përjashtuar një “qeveri kalimtare” që përfshin kundërshtarët e tij. [Berliner Zeitung]
