Presidentja e Kosovës, Vjosa Osmani, nga Antalya e Turqisë ka bërë të ditur se shteti afrikan, Sudani e ka njohur pavarësinë dhe shtetin e Kosovës.
Osmani, përmes një postim në Facebook e ka shpërndarë një video ku shihet në takim me shefin e diplomacisë sudaneze, derisa njofton për njohjen e pavarësisë nga ky shtet.
“Sudani njeh Republikën e Kosovës! Urime të gjithë qytetarëve të shtetit tonë!”, u shpreh Osmani, transmeton Telegrafi.
Tutje Osmani ka thënë se “Kjo nuk ishte vetëm njohje e republikës sonë, por edhe njohje e rrugëtimi të gjatë që të jemi të lirë, të pavarur dhe sovran”.
Ministri i Jashtëm i Sudanit, Ali Youssef, është ai që e ka njoftuar sot presidenten Vjosa Osmani për njohjen e pavarësisë së Kosovës.
Në një video të publikuar nga Osmani në Facebook, ai thotë se në emër të popullit paqedashës të Sudanit e njohin Kosovën.
“Jam i nderuar dhe i privilegjuar që jam dërguar nga presidenti im këtë pasdite, dhe pas takimit me presidentin Rexhep Taip Erdogan, që ishte një rrugë e mire dhe ogur i mirë për këtë mbledhi që e kemi këtu në Turqi. Dhe që ne vendosëm ta njohim vendin tuaj të bukur. Në emër të popullit paqedashës të Sudanit, ne e njohim vendin tuaj”, ka thënë Youssef.
Sudani, shtet në verilindje të Afrikës i është shtuar listës së shteteve që kanë njohur pavarësinë e Kosovës.
Kjo u bë e ditur të shtunën nga ana e presidentes së Kosovës, Vjosa Osmani. Në një njoftim në X, Osmani tha se Kosova dhe Sudani janë pajtuar për të lidhur marrëdhënie diplomatike.
“Ky është fillimi i një partneriteti madhështor”, shkroi Osmani.
E një vendim i tillë i shtetit afrikan është mirëpritur nga liderët e vendit.
Kryeministri në detyrë, Albin Kurti tha se shtetit tonë iu shtua edhe një njohje e re, e popullit tonë një miqësi më shumë.
urti ka thënë se “vendosja e marrëdhënieve diplomatike mes dy shteteve tona shpresojmë të zgjerohet dhe fuqizohet më tej”.
“Urime qytetarëve të Republikës sonë dhe faleminderit Presidentit të Sudanit për këtë vendim të rëndësishëm për marrëdhënien mes dy vendeve tona, si dhe Presidentes sonë për angazhimin e saj e miqve dhe partnerëve tanë për mbështetjen e vazhdueshme”, ka shkruar Kurti.
Edhe ministrja në detyrë e MPJD-së, Donika Gërvalla e mirëpriti vendimin e Sudanit për ta njohur Kosovën. Në një postim në Facebook, ajo u shpreh se mirënjohëse ndaj Sudanit dhe presidentes Vjosa Osmani për punën e saj.
“Kjo njohje vjen vetëm pak javë pas lajmit të mirë nga Kenia, duke forcuar më tej praninë dhe subjektivitetin ndërkombëtar të Republikës së Kosovës në Afrikë dhe përtej saj. Jemi thellësisht mirënjohës Sudanit për këtë vendim, Presidentes Osmani për punën e saj, si dhe të gjithë aleatëve tanë që kontribuuan në këtë sukses të përbashkët diplomatik”, tha Gërvalla.
Reagime positive pati edhe nga ana e partive opozitare në vend… [Telegrafi]
