[07 mars, 2024]
Suedia u bashkua zyrtarisht me Organizatën e Traktatit të Atlantikut të Veriut (NATO) në Uashington të enjten, dy vjet pasi pushtimi rus në Ukrainë e detyroi vendin skandinav të rishqyrtojë politikën e tij të sigurisë kombëtare dhe të arrijë në përfundimin se anëtarësimi në NATO është një garantues më i mirë i sigurisë sesa politika tradicionale e neutralitetit.
Kryeministri suedez Ulf Kristersson i dorëzoi të enjten qeverisë amerikane dokumentet përfundimtare, që është hapi i fundit në procesin e gjatë të anëtarësimit në NATO, i cili duhej të miratohej nga të gjithë anëtarët e aleancës ushtarake. “Gjërat e mira vijnë për ata që presin”, tha Sekretari Amerikan i Shtetit, Antony Blinken, duke marrë dokumentet për pranimin e Suedisë në NATO nga Kristersson, raporton Reuters.
“Ky është një moment historik për Suedinë, për aleancën tonë dhe për marrëdhëniet transatlantike”, shtoi Blinken. “Sot është vërtet një ditë historike. Suedia tani është anëtare e NATO-s”, tha Kristersson. “Arsyeja pse kjo është një përshtatje kaq e fortë dhe e fuqishme është se Suedia mishëron dhe promovon vlerat thelbësore që janë në thelb të NATO-s – demokracinë, lirinë, sundimin e ligjit,” vuri në dukje Blinken.
“Garancia përfundimtare e lirisë dhe sigurisë”
Për NATO-n, anëtarësimet e Suedisë dhe Finlandës, të cilat ndajnë një kufi 1,340 km të gjatë me Rusinë, janë më të rëndësishmet në dekadat e fundit të zgjerimit. Është gjithashtu një goditje për presidentin rus Vladimir Putin, i cili ka kërkuar të parandalojë forcimin e mëtejshëm të aleancës.
Sekretari i Përgjithshëm i NATO-s, Jens Stoltenberg, përshëndeti të enjten zgjerimin “historik” të NATO-s. “Pas më shumë se 200 vitesh mos-angazhim, Suedia tani gëzon mbrojtjen e dhënë nga neni 5, i cili është garancia përfundimtare e lirisë dhe sigurisë së aleatëve”, njoftoi Stoltenberg në X. “Suedia sjell me vete një forca të armatosur të aftl dhe një industri të klasit të parë të mbrojtjes. Pranimi i Suedisë e bën NATO-n më të fortë, Suedinë dhe gjithë Aleancën më të sigurt”, shtoi ai.
Ndërsa Stokholmi i është afruar gjithnjë e më shumë NATO-s gjatë dy dekadave të fundit, anëtarësimi shënon një ndarje të qartë me të kaluarën. Për më shumë se 200 vjet, Suedia shmangi aleancat ushtarake dhe mbajti një qëndrim neutral ndaj luftërave evropiane. [GN/ISHGJ]
