Parlamenti Evropian votoi një rezolutë që vë në dyshim presidencën hungareze të Këshillit të BE-së
Të enjten, përfaqësuesit e Parlamentit Evropian votuan me shumicë bindëse një rezolutë me të cilën e vënë në dyshim presidencën hungareze të Këshillit të BE-së në gjysmën e dytë të vitit të ardhshëm dhe i bëjnë thirrje Këshillit që të bëjë diçka për këtë, transmeton Hina.
Zagreb/Prishtinë, 1 qershor 2023 – Në seancën plenare në Bruksel, përfaqësuesit e Parlamentit Evropian votuan me shumicë të madhe rezolutën juridikisht jodetyruese – nga 619 që votuan, 442 ishin pro, 144 kundër dhe 33 abstenuan. Pesë nga shtatë klubet përfaqësuese e mbështetën rezolutën – Partia Popullore Evropiane, Socialistët dhe Demokratët, Liberalët, Të Gjelbrit dhe të Majtë.
Në tekstin e votuar, deputetët pyesin se si Hungaria mund të kryesojë me besueshmëri Këshillin e BE-së, duke pasur parasysh se nuk respekton ligjet dhe vlerat e BE-së dhe parimin e bashkëpunimit të sinqertë. Prandaj, ata kërkojnë nga Këshilli i BE-së që të gjejë një zgjidhje adekuate dhe theksojnë se Kuvendi mund të marrë masat e duhura nëse nuk gjendet një zgjidhje e tillë.
Parlamenti Evropian nuk mund të ndikojë në rendin e presidencës së Këshillit të BE-së, sepse kjo është kompetencë ekskluzive e shteteve anëtare. Të gjitha shtetet anëtare kryesojnë Këshillin për gjashtë muaj në një rend të paracaktuar. Hera e fundit që është bërë kjo ka qenë në vitin 2016, kur është përcaktuar rendi i presidencës deri në vitin 2030. Duke qenë se aty nuk mund të ndryshojnë asgjë, disa deputetë përmendin se Parlamenti duhet të përgjigjet në mënyra të ndryshme, nga refuzimi për të marrë pjesë në trilogje, ku tekstet përfundimtare të ligjeve bien dakord ndërmjet Këshillit dhe Parlamentit, deri te mosftimi i ministrave hungarezë në mbledhjet e komisioneve dhe seancat plenare.
Presidenca hungareze vjen në një moment shumë të rëndësishëm pas zgjedhjeve për Parlamentin Evropian, pas të cilave zgjidhet Komisioni i ri dhe Presidenti i ri i Këshillit Evropian. Për më tepër, pas Hungarisë, presidencën e rradhës në gjysmën e parë të 2025-ës duhet ta marrë Polonia, e cila gjithashtu prej vitesh është në konflikt me BE-në për sundimin e ligjit dhe standardet demokratike. Disa vite më parë u hap një procedurë kundër Hungarisë dhe Polonisë në bazë të nenit 7 të Traktatit të Bashkimit Evropian, i cili teorikisht u jep vendeve që shkelin sistematikisht dhe në mënyrë të vazhdueshme sundimin e ligjit dhe parimet demokratike të drejtën e votës në Këshillin e BE-së. Deri më
tani kjo procedurë nuk ka sjellë asnjë rezultat dhe masa përfundimtare e heqjes së të drejtës së votës është praktikisht e pamundur të kalohet sepse kërkon një vendim unanim.
Rezoluta shpreh shqetësimin se ligjet po miratohen në Hungari pa mbikëqyrje të mjaftueshme parlamentare dhe konsultim publik, për shkak të abuzimit me thirrjen e ‘gjendjes së rrezikut’, lirisë së shprehjes, abuzimit me mbrojtjen e sinjalizuesve për të minuar të drejtat e komunitetit LGBTIQ, shkelje të të drejtave të mësuesve dhe shkeljeve të të drejtave sociale dhe të ligjit të punës. [GN/ISHGJ]
