Gjermania me strategji të re për të reduktuar varësinë ekonomike nga Kina
Prishtinë, 14 korrik 2023 – Gjermania njoftoi dje se do të reduktojë varësinë e saj nga Kina në “sektorët kryesorë”, të cilët do të përfshijnë mjekësinë, bateritë e litiumit të përdorura në makinat elektrike dhe elementët thelbësorë për prodhimin e çipave. Qeveria gjermane ka publikuar “Strategjinë e saj të Kinës”, një dokument me 40 faqe që përshkruan një drejtim të ri në menaxhimin e varësisë së saj nga ekonomia e dytë më e madhe në botë. Perëndimi po kritikon gjithnjë e më shumë Kinën për shkeljen e të drejtave të njeriut dhe qëndrimit të saj ndaj ligjit ndërkombëtar. Kina është partneri më i rëndësishëm tregtar i Gjermanisë, me importe dhe eksporte mes dy vendeve që arriti shumën prej afro 300 miliardë euro në vitin 2022, raporton CNN Business.
“Kina ka ndryshuar. Si rezultat i kësaj dhe vendimeve politike të Kinës, ne duhet të ndryshojmë qasjen tonë ndaj Kinës”, thuhet në dokumentin që kabineti ka pranuar pas disa muajsh vonesa dhe diskutime brenda koalicionit të trefishtë të kancelarit Olaf Scholz. Kina është një partner kyç në luftën kundër ndryshimeve klimatike, pandemive dhe zhvillimit të qëndrueshëm, nënvizon dokumenti strategjik. Megjithatë, Kona “ndjek interesat e veta gjithnjë e më me vendosmëri dhe përpiqet të riformësojë rendin ndërkombëtar ekzistues të bazuar në rregulla në mënyra të ndryshme”, me pasoja për sigurinë globale, thuhet në dokumentin e qeverisë gjermane.
Dokumenti thekson se ekonomia më e madhe e Evropës dëshiron të ruajë lidhjet tregtare dhe të investimeve me Kinën, duke reduktuar varësinë në sektorë kritikë duke diversifikuar zinxhirët e saj të furnizimit, dhe ata e quajnë këtë qëllim “zvogëlimin e rrezikut”.
Kancelari Scholz tha në Twitter: “Qëllimi ynë nuk është të ndahemi [nga Pekini]. Por ne duam të reduktojmë varësitë kritike në të ardhmen.” Dokumenti thekson se Gjermania është shumë e varur nga Kina për teknologjinë
mjekësore dhe ilaçet, duke përfshirë antibiotikët, si dhe teknologjinë e informacionit dhe produktet e nevojshme për prodhimin e gjysmëpërçuesve me metale të ndryshme dhe minerale të rralla të nevojshme për tranzicionin e energjisë. “Në fushat kyçe, [Bashkimi Evropian] nuk duhet të bëhet i varur nga teknologjitë e vendeve [jashtë-BE-së], që nuk ndajnë vlerat tona themelore,” thotë ai. Ai ripohoi angazhimin e qeverisë për të përshtatur listën e produkteve që i nënshtrohen kontrolleve të eksportit në kuadër të zhvillimeve të reja teknologjike si siguria kibernetike dhe teknologjia e mbikëqyrjes. Qeveria do të nxjerrë gjithashtu dispozita në mënyrë që projektet e kërkimit dhe zhvillimit me Kinën “në të cilat rrjedhja e njohurive ka të ngjarë të ndodhë” nuk do të mbështeten nga fondet federale ose vetëm në kushte të caktuara, thotë dokumenti.
Por Kina është tregu më i rëndësishëm për disa kompani të mëdha gjermane, duke përfshirë Volkswagen-in dhe BMW, dhe qeveria tha se planifikon të zhvillojë bisedime me kompanitë “veçanërisht të ekspozuara ndaj Kinës” me qëllim “identifikimin e rreziqeve të përqendrimit të kapitalit”.
Një grup që përfaqëson kompanitë gjermane që operojnë në Kinë e mirëpriti strategjinë, por ngriti disa shqetësime. “Shumë kompani gjermane që operojnë në Kinë kanë ndërmarrë tashmë hapa vetë për të zbutur rreziqet dhe mendojnë se strategjia konfirmon drejtimin e tyre,” tha për CNN sot Jens Hildebrandt, drejtor ekzekutiv i degës kineze të Dhomës Gjermane të Tregtisë. “Është pozitive që qeveria është përmbajtur nga shtimi i ngarkesave burokratike për kompanitë si kërkesat e raportimit dhe njoftimit, testet e stresit ekonomik apo masat për verifikimin e investimeve jashtë vendit”, shtoi ai. “Megjithatë, disa kompani gjermane shpresonin se strategjia do të ofronte më shumë një kornizë për bashkëpunim në vend që të fokusohej vetëm në reduktimin e rrezikut”. Hildebrandt sugjeroi gjithashtu se dokumenti nuk ishte mjaftueshëm gjithëpërfshirës, duke thënë se “nuk trajton se si Gjermania mund të marrë pjesë në rritjen ekonomike dhe kapacitetin e inovacionit të Kinës për të forcuar ekonominë e saj”. [GN/ISHGJ]
