[26 dhjetor, 2023]
Komiteti i Punëve të Jashtme i Parlamentit turk miratoi kërkesën e Suedisë për t’u bashkuar me NATO-n, duke e afruar vendin nordik në aleancën ushtarake perëndimore.
Protokolli i pranimit të Suedisë tani do të duhet të miratohet në asamblenë e përgjithshme për fazën e fundit të procesit legjislativ në Turqi. Asnjë datë nuk është caktuar.
Turqia, një anëtare e NATO-s, ka vonuar ratifikimin e aplikimit të Suedisë për më shumë se një vit, duke akuzuar vendin se po ndihmon grupe që Ankaraja i konsideron si kërcënime për sigurinë e saj, duke përfshirë militantët kurdë dhe anëtarët e një rrjeti që Ankaraja i fajëson për një grusht shteti të dështuar në vitin 2016.
Presidenti turk Rexhep Tajip Erdogan hodhi një tjetër pengesë në fillim të këtij muaji duke lidhur hapur ratifikimin e anëtarësimit të Suedisë në NATO me miratimin e Kongresit Amerikan të një kërkese turke për blerjen e 40 avionëve luftarakë F-16 dhe kompleteve të reja për të modernizuar flotën ekzistuese të Turqisë.
Shtëpia e Bardhë ka mbështetur kërkesën turke për F-16, por ka kundërshtim të fortë në Kongres për shitjet ushtarake në Turqi.
Komiteti i punëve të jashtme i parlamentit turk kishte filluar diskutimin e anëtarësimit të Suedisë në NATO muajin e kaluar. Takimi megjithatë u shty pasi ligjvënësit nga partia në pushtet e Erdogan paraqitën një mocion për një shtyrje me arsyetimin se disa çështje kishin nevojë për më shumë sqarime.
Ndërsa sot, shumica e ligjvënësve në komitet votuan në favor të kërkesës së Suedisë për t’u bashkuar.
