[ Pas aktgjykimit në procesin për mashtrim]
Vendimi në procesin e mashtrimit në Nju Jork është një humbje e madhe për ish-presidentin. Kjo mund të çojë në ndryshime të rëndësishme në kompaninë e tij.
Nga ROLAND LINDNER [FAZ]
Përfundimi i procesit të mashtrimit në Nju Jork ngre pyetje në lidhje me të ardhmen e perandorisë së pasurive të paluajtshme të Donald Trump-it. Gjykatësi përgjegjës, Arthur Engoron, të premten nuk shqiptoi vetëm dënimin me gjobë prej gati 355 milionë dollarësh ndaj ish-presidentit amerikan. Ai gjithashtu ka vendosur që kompania e Trump-it, Korporata Trump, do të vendoset nën një kontroll më të rreptë. Në të ardhmen, dy mbikëqyrës të pavarur, do të monitorojnë atë në çdo hap se çkado që vepron.
Sipas vendimit, vetë Trumpi nuk lejohet më të shërbejë në bordin e drejtorëve ose bordin mbikëqyrës të një kompanie në shtetin e Nju Jorkut për tre vjet; kjo do të zbatohej gjithashtu për pjesë të Organizatës Trump. Djemtë e tij Eric dhe Donald Jr. gjithashtu u përfshinë në këtë vendim: Atyre iu shqiptua një ndalim dy-vjeçar dhe duhet të paguajnë secili një gjobë prej 4 milionë dollarësh.
Ata të dy aktualisht mbajnë titullin e “Zëvendës Presidentit Ekzekutiv” në kompani, me Eric që vepron si CEO de facto [administrator] . Vendimi i gjyqtarit mund të ketë efektin që perandoria e Trumpit do të drejtohet, të paktën përkohësisht, nga menaxherë jashtë familjes.
“Mungesa e pendimit nga ana juaj kufizohet me patologjinë”
Procesi gjyqësor buron nga një padi e ngritur në shtator 2022 nga Prokurorja e Përgjithshme e Nju Jorkut, Letitia James. Ajo akuzon Trumpin se ka dhënë vlerësime të fryra për perandorinë e tij të pasurive të paluajtshme për vite me radhë, në mënyrë që të përfitojë kushte më të favorshme kredie nga bankat.
Padia përmban një sërë shembujsh: Thuhet se Trumpi caktoi një sipërfaqe prej 2,800 metrash katrorë për apartamentin e tij trekatësh në Trump Tower, edhe pse ishte vetëm pak më shumë se 1,000 metra katrorë. James fillimisht kërkoi një gjobë prej 250 milionë dollarësh, por më pas e rishikoi shumën në 370 milionë dollarë. Gjyqtari iu afrua shumë ideve të prokurorëve me vendimin e tij. Nga gjoba e vendosur tani, 168 milionë dollarë i atribuohen vetëm interesit, të cilin Trump thuhet se e ka kursyer përmes vlerësimeve të fryra.
Gjykatësi Engoron pati fjalë të ashpra për Trumpin në vendimin e tij prej 92 faqesh. “Për të qenë në gjendje të merrnin më shumë para hua me norma më të ulëta interesi, të pandehurit paraqitën në mënyrë të hapur informacione të rreme financiare.” Gjatë gjykimit, ata nuk ishin të gatshëm të pranonin përgjegjësinë. “Mungesa nga ana juaj e plotë e pendesës kufizohet me patologjinë.”
Trumpi paralajmroi për apelim të vendimit
Gjykatësi gjithashtu shkroi se ai kishte marrë parasysh edhe faktin se kompanitë e Trump-it kishin kryer veprime të paligjshme në të kaluarën dhe se ky nuk ishte “rasti i tij i parë”. Vetë Trumpi dëmtoi besueshmërinë e tij në qëndrimin prej dëshmitarit duke mos iu përgjigjur pyetjeve drejtpërdrejt ose duke mos iu përgjigjur fare atyre. Për shembull, ai këmbënguli që Mar-a-Lago, klubi i tij privat në Florida, do të vlente nga një deri në një miliardë e gjysmë dollarë, që do të ishte shumë herë më shumë se prona rezidenciale private më e shtrenjtë aktualisht në SHBA.
Avokatja e Trump, Alina Habba, e quajti vendimin “padrejtësi të dukshme” dhe njoftoi se do ta dërgojnë lëndën në apel. Megjithatë, Trumpi duhet të dorëzojë lirimin me kusht brenda 30 ditëve, që do të thotë se vendimi ka të ngjarë të ketë pasoja financiare për të shumë shpejt. Duke pasur parasysh numrin e madh të pronave vetëm në portofolin e tij, ndoshta nuk ka rrezik që ai të kërkojë falimentim, por asetet e tij likuide mund të tkurren ndjeshëm.
Trumpi tha nën betim vitin e kaluar se kishte më shumë se 400 milionë dollarë në para. Mund të imagjinohet që Trump do të detyrohej të shesë pasuri të paluajtshme për të paguar gjobën, veçanërisht pasi ai u urdhërua të paguante 83 milionë dollarë në një çështje tjetër civile vetëm disa javë më parë. Ai supozohet t’i paguajë këtë shumë autores E. Jean Carroll, e cila e akuzoi se i kishte dëmtuar reputacionin duke mohuar se e kishte përdhunuar në vitet 1990.
Vendimi në Nju Jork mund të ishte edhe më i keq për Trump-ët. Prokuroria publike kishte kërkuar ndalime edhe më të gjata. Gjykatësi gjithashtu anuloi një urdhër të mëparshëm që anulonte licencat e biznesit të Trumpit në Nju Jork. Kjo mund të kishte rezultuar që Trumpi të humbiste kontrollin e disa prej pronave të tij më ikonike, siç është Trump Tower. Engoron tha se për shkak se tani do të ketë shumë mbikëqyrës të pavarur të kompanive të Trumpit, heqja e licencave nuk është më e nevojshme.
Gjyqi për çështjen civile filloi në tetor dhe u zvarrit deri në janar. Trumpi gjithashtu mori qëndrimin e dëshmitarit dhe hodhi poshtë akuzat. Ai tha se beson se pronat në raportet e tij financiare nuk janë të mbivlerësuara, por të nënvlerësuara. Ai gjithashtu sulmoi rregullisht gjyqtarin Engoron dhe Prokurorin e Përgjithshëm James gjatë gjyqit. Avokatët e tij argumentuan se nuk kishte viktima. Shtëpitë financiare si Deutsche Bank, e cila i dha hua Trumpit, nuk pësuan dëme financiare dhe nuk u ankuan për mashtrim. Për më tepër, vlerësimi i pasurive të paluajtshme është një çështje subjektive.
Pasuria e Trump vlerësohet në 2.6 miliardë dollarë
Në padinë e saj, Zyra e Prokurorit të Përgjithshëm përmendi shkelje të Ligjit Ekzekutiv të Nju Jorkut 63 (12). Ky është një ligj që synon të ndëshkojë praktikat e përsëritura mashtruese të biznesit. Për të vërtetuar mashtrimin sipas këtij ligji, nuk është e nevojshme që veprimi të jetë kryer me dashje ose të jetë dëmtuar nga dikush.
Përveç mosmarrëveshjeve civile, Trumpi përballet edhe me katër padi penale. Ai ka përdorur betejat e tij ligjore të profilit të lartë për të kërkuar donacione. Pasuritë e tij totale u vlerësuan së fundmi nga Forbes në 2.6 miliardë dollarë. Në vitin 2015, një vit para se të bëhej president, ishte në një nivel rekord prej 4.5 miliardë dollarësh.
Ai vetë tha gjatë kësaj kohe se pasuria e tij ishte më shumë se 10 miliardë dollarë. Forbes vlerëson vlerën aktuale të pasurive të paluajtshme të Trumpit në Nju Jork në 690 milionë dollarë. [Përktheu: ISHGJ]
