Asambleja Kombëtare e Republikës Srpska ndaloi me ligj zbatimin e vendimeve të Gjykatës Kushtetuese shtetërore
[27 qershor 2023] – Të martën, Parlamenti i Republikës Srpska miratoi ligjin që ndalon zbatimin e vendimeve të Gjykatës Kushtetuese të BeH në territorin e atij subjekti, i cili menjëherë u vlerësua si sulm ndaj rendit kushtetues të vendit, transmeton Hina.
Ligji, miratimi i të cilit u iniciua nga Presidenti i RS Milorad Dodik, u pranua me votat e përfaqësuesve të shumicës qeverisëse, e cila është nën kontrollin e tij.
Përfaqësuesit e opozitës e bojkotuan votimin dhe më parë paralajmëruan gjatë diskutimit se ishte një tjetër shfaqje për publikun dhe se ligji në fund të fundit nuk do të ketë efekt juridik, sepse me siguri do të rrëzohet nga e njëjta Gjykatë Kushtetuese e Bosnjë-Hercegovinës, veprimet e të cilës vihen në dyshim.
Në seancën e Kuvendit erdhi edhe Dodik për të ndikuar që opozita të mbështeste ligjin, por nuk ia doli. Me këtë rast ai sulmoi Gjykatën Kushtetuese dhe ofendoi gjyqtarët e saj. Ai pretendoi se ata marrin vendime kundër kushtetutës që janë në dëm të Republika Srpska.
Miratimi i ligjit është i diskutueshëm sepse, sipas kushtetutës, vendimet e Gjykatës Kushtetuese të BeH janë përfundimtare dhe detyruese, dhe moszbatimi i tyre mund të rezultojë me një dënim deri në pesë vjet burg. Kushtetuta e BeH është pjesë përbërëse e Marrëveshjes së Dejtonit, kështu që veprimet e autoriteteve në Republika Srpska janë gjithashtu një shkelje e drejtpërdrejtë e këtij dokumenti.
Në RS po planifikojnë të përdorin një ligj të veçantë për të mbrojtur ata që nuk zbatojnë vendimet e Gjykatës Kushtetuese nga ndjekja penale. [GN/ISHGJ]
