Udhëheqësi i Koresë së Veriut Kim Jong-un bëri thirrje për forcimin “e pakufizuar” të aftësive bërthamore dhe përgatitjet për luftë, njoftoi agjencia shtetërore e lajmeve KCNA. Në një fjalim gjatë një konference të komandantëve dhe instruktorëve të Ushtrisë Popullore Koreane, Kim akuzoi SHBA-në dhe Korenë e Jugut për përshkallëzimin e tensioneve në Gadishullin Korean, duke e quajtur rajonin “pikën më të madhe të ndezjes në botë”.
Në të njëjtën kohë, miliona banorë të Suedisë, Norvegjisë dhe Finlandës marrin broshura me udhëzime për situata krize, duke përfshirë skenarë lufte. Broshurat janë përditësuar për të pasqyruar “përkeqësimin e situatës së sigurisë” pas pushtimit të Ukrainës nga Rusia dhe përfshijnë këshilla për furnizimin me ushqime, ilaçe dhe nevojat bazë.
Suedia ka shpërndarë kopje fizike të broshurës Nëse lufta vjen, e krijuar gjatë Luftës së Dytë Botërore, e cila tani paralajmëron qytetarët për mundësinë e luftës dhe thekson rezistencën në rast sulmi. Mesazhi “ne nuk do të dorëzohemi kurrë” është theksuar në versionin e ri të broshurës.
Parashikimi i fatkeqësisë
Ministri i Mbrojtjes Civile Carl-Oskar Bohlin paralajmëroi në fillim të këtij viti se “mund të ketë një luftë në Suedi”, duke bërë thirrje për përshpejtimin e përgatitjeve për “mbrojtje totale”. Finlanda ka publikuar udhëzime të ngjashme në internet, duke shmangur shtypjen e broshurave për arsye ekonomike. Përveç pajisjeve për situata krize, guidat finlandeze mbulojnë edhe reagimin e autoriteteve në rast konflikti ushtarak. Finlanda, e cila ndan një kufi të gjatë me Rusinë dhe ka një histori konflikti me ish-Bashkimin Sovjetik, ka ruajtur një nivel të lartë mbrojtjeje për dekada.
Norvegjia shtypi dhe shpërndau 2.2 milionë broshura, duke ofruar këshilla për vetë-mjaftueshmërinë për një javë në rast lufte ose fatkeqësish natyrore. Lista e rekomandimeve përfshin ushqime me jetëgjatësi, ilaçe, madje edhe ushqim për kafshët shtëpiake.
Hyrja e Suedisë dhe Finlandës në aleancën e NATO-s gjatë dy viteve të fundit theksoi më tej ndryshimin e tyre në politikat e sigurisë. Ndërsa Finlanda ishte tradicionalisht e vetëdijshme për kërcënimin e luftës, Suedia e injoroi këtë mundësi për vite me radhë, e cila tani po ndryshon me shpejtësi. [GN/ISHGJ]
