[05 janar, 2025]
Sekretari amerikan i Shtetit në largim Antony Blinken, pranoi se Shtetet e Bashkuara “dërguan në heshtje shumë armë në Ukrainë” pesë muaj para konfliktit. “Ne e pamë konfliktin që po vinte,” tha Blinken në një intervistë me The New York Times, duke vënë në dukje se Shtetet e Bashkuara janë siguruar që “Ukraina të jetë gati” duke i dërguar miliarda dollarë dhe armë që nga shtatori 2021.
“Ne u kujdesëm për këtë shumë përpara se të ndodhte lufta, duke filluar në shtator dhe më pas në dhjetor, ne dërguam në heshtje shumë armë në Ukrainë. Gjëra si Stinger, Javelin…” tha ai në një intervistë.
Blinken është për anëtarësimin e Ukrainës në NATO
“Ajo që duhej të shikonim çdo herë nuk ishte vetëm nëse duhet t’i jepnim këto armë ukrainasve, por nëse ata dinë t’i përdorin ato? A mund ta ruajnë atë?” shtoi ai. I pyetur nëse ishte koha për t’i dhënë fund konfliktit, Blinken tha se një armëpushim ndoshta do t’i jepte një pushim Rusisë dhe se çdo armëpushim duhet të sigurojë që Ukraina mund të “frenojë agresionin e mëtejshëm”, i cili, vuri në dukje ai, mund të arrihet përmes anëtarësimit në NATO .
“Rusia ka folur për këtë për vite me radhë”, tha zëdhënësja e Ministrisë së Jashtme ruse Maria Zakharova në përgjigje të pretendimit të Blinken, duke vënë në dukje se Moska kishte theksuar “çmilitarizimin e Ukrainës” si një qëllim. “Ne kemi shprehur shqetësimin për injektimin e armëve nga Shtetet e Bashkuara dhe Britaninë në Ukrainë, stërvitjet e pafundme të NATO-s në Detin e Zi që shkelin kufijtë rusë dhe afërsinë e rrezikshme të avionëve ushtarakë perëndimor me avionët civilë në hapësirën tonë ajrore”, shtoi ajo për TASS. [GN/ISHGJ]
