Presidenti amerikan Donald Trump dhe ai rus Vladimir Putin kanë përfunduar bisedën e tyre telefonike për mënyrat për t’i dhënë fund luftës në Ukrainë.
Kremlini konfirmon pezullimin 30-ditor të sulmeve ndaj infrastrukturës energjetike të Ukrainës.
18.03.25, 18:54
Presidenti amerikan Donald Trump dhe ai rus Vladimir Putin folën në telefon për herë të dytë që kur Trumpi mori detyrën në janar. Zëdhënësi i Kremlinit, Dmitry Peskov, tha në Moskë se telefonata kishte përfunduar. Më herët, një nga zëvendës shefat e stafit të Shtëpisë së Bardhë, Dan Scavino, raportoi në Platformën X se biseda po shkonte mirë.
Putini dhe Trumpi thuhet se kanë folur në telefon për rreth dy orë. Biseda përfundoi në orën 18:00. Gjatë bisedimeve të tyre, të dy nuk arritën një marrëveshje për një armëpushim të përgjithshëm për luftën në Ukrainë. Kjo duket nga deklaratat e të dyja qeverive të publikuara pas takimit të presidentëve.
Donald Trumpi po bën presion për një armëpushim të shpejtë në Ukrainë. Një telefonatë me shefin e Kremlinit Putinin synon t’i hapë rrugën kësaj ideje. Moska deri më tani ka treguar përmbajtje dhe ka vendosur kushte.
Qeveria në Moskë ka ende nevojë për sqarime të mëtejshme pas bisedimeve mes presidentit amerikan Donald Trump dhe presidentit rus Vladimir Putin. Ka ende një numër çështjesh të hapura, raportuan të martën agjencitë ruse të lajmeve.
Megjithatë, Putin ka rënë dakord të pezullojë sulmet ndaj infrastrukturës ukrainase për një periudhë prej 30 ditësh. Ai bëri thirrje për ndalimin e ndihmës me armë për Ukrainën.
Të dy presidentët ranë dakord të qëndrojnë në kontakt. Gjithashtu, duhet të formohen grupe pune për të hartuar një marrëveshje. Më herët, i dërguari special i Putinit, Kirill Dmitriev, tha se nën Trumpin dhe Putinin, bota është bërë një vend shumë më i sigurt sot.
Trumpi dhe Putini diskutuan për pretendimet territoriale
Sipas Trumpit, diskutimi u përqëndrua, ndër të tjera, rreth pretendimeve territoriale, termocentraleve dhe, siç tha ai, “ndarjes së të mirave [mallrave] të caktuara”. Në tryezë është propozimi i SHBA-së për një armëpushim 30-ditor në Ukrainë, për të cilin Kievi tashmë ka rënë dakord pas një takimi midis përfaqësuesve të SHBA-së dhe Ukrainës në Arabinë Saudite javën e kaluar. “Për shumë elemente të një marrëveshjeje përfundimtare janë rënë dakord, por mbetet shumë për të bërë,” shkroi Trumpi në Truth Social para bisedës.
Tone të ngjashme u dëgjuan edhe nga Moska. Ka një “mirëkuptim të caktuar” me SHBA-në, tha zëdhënësi presidencial Dmitry Peskov. Megjithatë, ka edhe një numër të madh çështjesh për t’u diskutuar. [Kurier/ISHGJ]
