Tiranë, 20 Janar 2025
Këshilli i Ambasadorëve Shqiptarë përshëndet vendimin e Përfaqësueses së Lartë të Bashkimit Evropian për Politikë të Jashtme dhe Siguri, znj. Kaja Kallas, për emërimin e diplomatit danez, z. Peter Sørensen, si Përfaqësues i Posaçëm i BE-së për dialogun mes Kosovës dhe Serbisë.
Zgjedhja e z. Sørensen, një diplomat me përvojë të spikatur në çështjet rajonale dhe të angazhuar në promovimin e stabilitetit dhe bashkëpunimit në Ballkanin Perëndimor, përfaqëson një hap të rëndësishëm në përpjekjet për normalizimin e marrëdhënieve mes dy vendeve.
Fakti që z. Sørensen vjen nga Danimarka, një vend anëtar i Bashkimit Evropian që ka njohur pavarësinë e Republikës së Kosovës, përbën një vlerë të shtuar për procesin e dialogut. Ky element rrit besueshmërinë e tij si ndërmjetës dhe reflekton mbështetjen për respektimin e sovranitetit dhe integritetit territorial të Kosovës.
Këshilli i Ambasadorëve Shqiptarë thekson rëndësinë e një dialogu të hapur, gjithëpërfshirës dhe të barabartë, si dhe nxit palët të angazhohen me seriozitet dhe konstruktivitet në zgjidhjen e çështjeve të hapura. Një proces i tillë është thelbësor për të garantuar paqen, stabilitetin dhe integrimin e mëtejshëm të rajonit në strukturat euroatlantike.
Këshilli shpreh mbështetjen e plotë për përpjekjet e Bashkimit Evropian dhe z. Sørensen në këtë rol të rëndësishëm dhe inkurajon bashkësinë ndërkombëtare të vijojë të mbështesë të ardhmen euroatlantike të Kosovës dhe gjithë rajonit të Ballkanit Perëndimor.
Burimi: https://albanianambassadors.al/sq/keshilli-i-ambasadoreve-shqiptare-mbi-emerimin-e-diplomatit-danez-z-peter-sorensen-si-perfaqesues-i-posacem-i-be-se-per-dialogun-mes-kosoves-dhe-serbise/?fbclid=IwY2xjawH_FpJleHRuA2FlbQIxMQABHUxjznOACKRkFKMIP6JEoDMVor7Z2ucJnTC0UkgXD9_46xqFBFyhGa–6w_aem_3dFxF5lQEQyyOKHnlE25FQ