[21 qershor, 2024]
Bashkimi Evropian ka pranuar zyrtarisht të hapë negociatat me Ukrainën dhe Moldavinë për anëtarësimin në bllok, një hap i rëndësishëm simbolik në një proces që do të zgjasë me vite. Vendet anëtare të BE-së kaluan sot pengesën e fundit dhe bisedimet zyrtare të pranimit mund të fillojnë më 25 qershor në Luksemburg, sipas Belgjikës, e cila kryeson bllokun, raporton Bloomberg.
Hungaria kishte bllokuar masën, duke përmendur shqetësimet për të drejtat e pakicave hungareze në Ukrainë, një kërkesë e kahershme që Brukseli dhe Kievi tani këmbëngulin se është përmbushur. Në mars, Komisioni Evropian propozoi një kornizë negociuese për të vendosur udhëzime dhe parime për negociatat e pranimit, pas vendimit të liderëve të BE-së për të hapur bisedimet e anëtarësimit me Ukrainën në dhjetor.
Procesi përpara për Ukrainën dhe Moldavinë do të jetë i gjatë dhe i ndërlikuar, veçanërisht në mes të një lufte. Moldavia është gjithashtu në një pozitë të vështirë sepse rajoni i saj gjysmë autonom lindor i Transnistrisë përballet me Moskën, jo me Brukselin. Kroacia ishte vendi i fundit që iu bashkua bllokut dhe kërkesa mori 10 vjet para se të pranohej zyrtarisht në 2013. [GN/ISHGJ]
