Putin udhëton në Kinë dhe vlerëson propozimin e Pekinit për paqe me Ukrainën
[16 tetor, 2023]
Presidenti rus Vladimir Putin tha se propozimi i Kinës për paqen me Ukrainën mund të bëhet një bazë reale për një marrëveshje midis Kievit dhe Moskës, sipas një interviste për televizionin kinez të publikuar nga Kremlini të hënën, siç raportohet nga dpa.
Presidenti rus do të udhëtojë në Pekin të martën për t’u takuar me liderin kinez Xi Jinping dhe për të marrë pjesë në samitin e Nismës Brez dhe Rrugë.
Putin akuzon Ukrainën se nuk i lejon negociatat e paqes: “Si mund të zhvilloni negociata nëse nuk e duan dhe kanë publikuar një dokument normativ që i ndalon?”.
Ai ka theksuar se parakusht për fillimin e negociatave është shfuqizimi i atij dekreti dhe ekzistimi i vullnetit për bisedime. Kievi përsërit se ushtria ruse duhet të largohet nga territori ukrainas përpara fillimit të bisedimeve.
Propozimi kinez për paqen u prit me skepticizëm në Ukrainë dhe në Perëndim, sepse Kina konsiderohet aleate e Rusisë dhe nuk e ka dënuar kurrë pushtimin e nisur nga Moska në shkurt 2022.
Në Pekin, Putin dhe Xi pritet të diskutojnë politikën ndërkombëtare, duke përfshirë situatën në Lindjen e Mesme, tha Kremlini.
Ky do të jetë udhëtimi i dytë i Putinit jashtë vendit, pas Kirgistanit javën e kaluar, pasi Gjykata Ndërkombëtare Penale lëshoi një urdhër arresti për të për akuzat për krime lufte në mars. Kina nuk është nënshkruese e Statutit të Romës që themeloi gjykatën dhe për këtë arsye mund të injorojë urdhrin.
Alexey Miller, kreu i gjigantit të gazit Gazprom dhe Igor Sečin, drejtor i gjigantit të naftës Rosneft, po udhëtojnë në Kinë me Putinin, raporton RIA.
RIA, duke cituar zyrtarin e Kremlinit, Yuri Ushakov, shkruan se nuk priten marrëveshje të reja gazi apo nafte gjatë vizitës. Rusia planifikon të ndërtojë një gazsjellës të dytë për në Kinë, Power of Siberia 2, me një kapacitet prej 50 miliardë metra kub gaz në vit, por diskutimet mbi çmimet dhe çështje të tjera që lidhen me ndërtimin e gazsjellësit nuk kanë qenë konkrete. Larg.
Gjatë vizitës së tij në Kinë vitin e kaluar, Putin siguroi një kontratë 30-vjeçare për të furnizuar Kinën me 10 miliardë metra kub gaz nga ishulli rus i Sakhalin. [GN/ISHGJ]
